第一日享受完五星級大酒店的設備, 第二日就要晨咁早起身啦~~ >_<~~
因為要去常德市參觀芙蓉鎮同鳳凰古城, 車程都需要4個鐘頭呀.由於我住的酒店每日都唔同,所以領隊每日都問團友有冇帶証件, 影相的MEMORY CARD, 錢等等.
因為佢話以往的經驗, 有D團友去到目的地才同佢講話係酒店忘記帶呢D物品, 皆因我們呢團係長者團, 果團年紀最細係我,所以佢特別提醒老友記.
車程期間, 導遊介紹芙蓉鎮同鳳凰古城同埋湖南的地理資料, 而且仲講解當地的飲食習慣.
佢話有一句說話可以知道湖南人最鐘意食什麼?
{四川人 辣不怕} {湖南人 不怕辣} 你估吓湖南人同四川人邊個鐘意食辣? 下回分解
經過食完又訓, 訓完又食的4個鐘頭的車程, 終於到達芙蓉鎮.芙蓉鎮以前的名字叫王城, 是秦漢時期酉陽城舊址, 係土家民族特色及兩千幾年的歷史文化古鎮, 長長的石板長街, 兩旁板門店舖反映淳樸的家民族風情,自從劉曉慶在1986年係這裏拍了芙蓉鎮呢套電影之後, 當地人就叫做芙蓉鎮啦!
而且芙蓉鎮最出名的食物就係米豆腐, 鐘意食的我當然唔會錯過啦!!
最出名食米豆腐就係113號店舖
米豆腐的外型似一條條類似銀針粉, 顏色綠綠地, 可惜口感就.............有D怪怪的, 似捉鬼咁死隊的么口水咁呢~~食完第一口之後就冇再食過LU.
仲有秘制薑糖, 蒿草粑的地道美食.
芙蓉鎮的店舖
食過八餸一湯的午餐之後, 又要坐2個半鐘頭車程到今日的主菜----> 鳳凰古城
當我去到鳳凰古城之後, 先感受到古城的氣氛, 好似返到古時的小城一樣, 沱江的兩岸有好多的亭台樓閣, 而且苗人係江邊洗衫, 連接兩邊的就依靠冇扶手的橋, 我很佩服當地人, 佢地可以在水流咁急的石橋上過.兩岸的橋有2條, 1 條高的石柱再加上木板, 另1條就只有矮矮的石柱所舖成.
點解叫做鳳凰古城?
因為西南有一座山好似鳯的形態, 因此而得名的, 而古城有2個主要的城門, 1 個叫做紅門, 至於另1個就.....唔記得咗呢~~~
因為古城地方大的原故, 所以我只係行咗一邊的古城, 如果有時間的話, 另一邊應該都係好靚呢~~
經過古城老店的盡頭, 有一個紀念鳳凰古城的紀念石碑及巨大鳳凰銅像水池.
古城最出名的係薑糖, 有大, 中, 小辣選擇, 適合喜歡不同的辣味的人仕.
本來我同遙爸媽想睇古城的夜景, 可惜遙爸媽都感到好累, 畢竟他們不是年青, 所以我錯過咗夜景的情況.
但當地導遊話古城夜景係五光十色照耀住古城, 而且好多人會在江邊放紙船.日與夜的古城形成強烈的對比.
古城的夜景
而當晚住的酒店係鳳凰古城天下鳳凰大酒店, 呢間酒店利用天然環境, 依山而建, 採用園林式的建築風格, 形成山中有樓, 樓中有山的風景.本來我們住應該設備好的房間, 可惜臨時有高官來住, 令到我們住的房間變得不太理想, 真掃興, 唉!!!!!!
請密切留意第3集呢~~~~BYE
Hong Kong Time
